الخيار الدبلوماسى
الخيار البلوماسى هي الدبلوماسية التقليدية الأكاديمية اللى حبر على ورق بفره يشرب الحبر من هنا ويتفرفت حتت حتت ومينفعش تلف بعدها سيجارة , لكن الدبلوماسية الواقعية حاجة تانية خالص .الدبلوماسية فن اقناع الغير انك جدع أوى وانك دايما على حق وتموت فى الحق وميطلعش من بقك الا الحق وانهم غلطانين الليل بطوله غلطانين تبقى عملية اقناع بالكلام وان صاحبنا منفعش معاه الكلام يبقى لازم يكون عندك قوة علشان تفرد نفسك وتقوم توريله شغله وساعتها تبقى واد دبلوماسى ومسيس بتاع سياسة يعنى . الدول كلها بتتعامل بدبلوماسية انت نفسك فى حياتك دبلوماسى لما تقنع بتاع الفول انه يتوصى شوية أو يزود شوية زيت تبقى دبلوماسى لما تلاقى طابور عيش طويل وتروح حاشر نفسك وزارق فى نص الطابور وتقنع بقية الناس ان الوليه بتولد ومش عايز تأخر فطار النونو تبقى دبلوماسى . لما ييجى اتوبيس وتجرى اول واحد وتضرب بكيعانك فى اللى حواليك وبيزاحموك علشان تركب تبقى دبلوماسى ولما تقعد على قهوة مع صاحبك ومتطلعش ولا سيجارة من جيبك وتهف كل سجايره تبقى لا مؤاخذة حمله وملكش اى علاقة بالدبلوماسية.
التاريخ طويل جدا وتعالوا نتفرج كاتبغا دخل على قطز بعد مقتل شجرة الدر وقاله حتدفعوا فردة وقطعة من أرض مصر , دى دبلوماسية لانه طلب بالأدب وعنده من القوة انه يعمل ويعمل وكانت نتيجته انهم نتفوا ريش الفراخ اللى فى الطاسة اللى لابسها على دماغه قبلها بعد قيام رينو دى شاتينون (الشهير فى الاوساط العربية بارناط السفاح) بقتل قافلة عربية وتعمده قتل اخت صلاح الدين الايوبي اللى على خصر القافلة , صلاح الدين اتصرف تصرف دبلوماسى وبعت سفير (على اسمى ) راح للصليبيين فى مملكة بيت المقدس (القدس) بيطلب تسليم القاتل .... فقام جى دى لوازنيون ببج بطنه سبع بجابيج ومصارينة بقت مدلدلة منه مترين .
يعنى زمان قرفان من واحد عندك فى القصر ومطلع عينك ومش طايق تشوف وشه تروح باعته طوالى فى مهمة دبلوماسية وساعتها تضمن انه حيروح فى طريق دائرى اتجاه واحد حتى عضامه وهدومه حتتعلق فى المحور ومش حترجع تانى . دى دبلوماسية زمان بين الدول فى القرن العشرين ظهر نوع جديد من الدبلوماسية وهى استراتيجية الخيار الدبلوماسى فالدول بعد ما تحررت من استعمال وهرى الاستعمار ليها عمال على بطال , قررت انها تزرع بلادها فالمستعمر برضه اقنعهم بزراعة الخيار ... الخيار الدبلوماسى وللعلم زراعة الخيار سبقت زراعة الكوسة فى الدول النايمة على شوال الخيار فى الغيط اما فى القرن الواحد والعشرين استطاعت دول الاستعمار برضه تهجين نوع جديد من الخيار الدبلوماسى وهو خيار معد خصيصا للبس وليس للأكل وقام العالم الزراعى العبقرى جورج دبليو بوش بتجربة النوع الجديد ولبسه كل العرب عن بكرة أبيهم واستراحوا فيه واصبح الشعار العربى دبلوماسية لكل مواطن .