أقباط
![](http://static.miraheze.org/beidipediawiki/thumb/e/e4/Fourreesha.jpg/250px-Fourreesha.jpg)
الأقباط كائنات خرافية هبطت على أرض مصر من كوكب Coptic يعاني أفرادها من مشكلة الإسم المشترك الذي هو مصطلح غريب مش هتلاقيه غير في مصر. لو حاولت تفهم الجملة ممكن تتخيل أنه يقصد اسم مشترك بين ولد وبنت زي رأفت ورضا وعصمت لكن الغريب في مصر أن مصطلح اسم مشترك يطلق في المقام الأول على الاسم اللي بيؤدي إلى ديانتين : مسلم ومسيحي , زي باسم وماجد و فيه نبيل , ده قديم شوية أو هاني ، وهلم جرش . فيه ناس رخمة تلاقي اسمها الثلاثي مشترك زي إبراهيم فوزي عادل , ادي دقني لو عرفت ده مسلم ولا مسيحي . معضلة الأسماء المشتركة في مصر ومعاناة أصحاب هذه الأسماء في التعاملات اليومية ، وسؤالهم عن هويتهم الدينية باستمرار , بغض البصر عن انه سؤال غبي بس لو قلنا إنه مجرد سؤال تفتكر الإجابة هايترتب عليها ايه ؟ وليه السؤال أصلا طالما أنا مش جاي أخطب بنتك أو أختك . علاقة الأقباط في مصر بالشرطة علاقة معقدة وشائكة فعندما تقع مشكلة ولو بسيطة بين واحد مسلم وواحد قبطي يتم الضغط على الطرفين بالتنازل عن المحضر ولو ماتصالحتوش هاتتحولوا أمن دولة ، ليشعر الطرف المسلم أن الحكومة تقف في صف المسيحيين ، في نفس الوقت الذي يرى فيه شريكه في المصيبة الواحدة وهو المسيحي أن حقه ضايع . البعض يروج لفكرة أن أمن الدولة هو اللي حامي المسيحيين في مصر.
المسلم لا يعرف شيئا عن المسيحي جاره الذي يعيش معه في نفس الشارع أو حتى العمارة . الأحاديث العادية بين المواطنين حول مسألة الحرام عندنا وعندكم , و عندنا وعندكم في كل المسائل والمعضلات الفقهية . هو عندكم مافيش سجود في الصلاة ؟ , هو عندكم بتصلوا ازاي ؟ , هو ليه عندكم الستات مش بتتحجب ؟ , هو عندكم كذا مش حرام , هو عندكم حرام العطور للراجل ؟ , أو نجاسة الكلاب OK عندكم ؟ وكذا دي ممكن ييجي وراها أي شيء يخطر ببالك . حسب حاجة الزبون للمعرفة الدقيقة . القبطي عادة أسئلته قليلة في هذه الأمور لأن كل حاجة باينة وحافظينها ليلي نهارى من المناهج الدراسية والقنوات الفضائية , وعبر الأثير , لكن المسلمين بقي فالسؤال بييجي لما تطلب معاه ممكن لما تيجي السيرة أو حتى فجأة لما يشوف مشهد معين ماقدرش يفسره للعالم دي . تتوالى الأسئلة الغريبة ، مرورا بأشهر الشائعات المنتشرة عن المسيحيين في مصر بين المسلمين ، لاسيما البسطاء منهم، مثل ليه المسيحيين بيطفوا النور في الكنيسة ليلة رأس السنة ، وهو سؤال يحير أغلب المسلمين في مصر, مافيش مسيحي في مصر ماحدش زنقه في السؤال ده وأغلب المسلمين متأكدين من صحة تلك الشائعة أمال ليه بيوقفوا لهم أمن كتير قدام الكنيسة يومها ؟ .
سؤال ماحدش يعرف إجابته في مصر لا مسلمين سألوا السؤال ولا نصاري اتسألوه عرفوا يجاوبوه , ليه ريحة بيوت المسيحيين غريبة ؟ , غريبة إزاي يعني ؟ يقولك ماعرفش , تحس ان فيه ريحة غريبة كده مش طبيعية وناس تانية تقولك لا يا عم عادي حتى المسيحيين نفسهم اللي سمعوا السؤال ده فيهم اللي يستغرب ويقولك أنا أول مرة أسمع الكلام ده واللي يغيظك أنك لو سألت واحدا من دول اللي ماشيين يشموا في خلق الله طب انت دخلت بيت واحد مسيحي وشميت بنفسك , يقولك لا ياعم . لماذا يرتدي القسيس في مصر الملابس السوداء , الرائج بين بعض العامة أن ذلك حدث حزنا على دخول الإسلام مصر . لو أنت مسلم , فأنت مسلمأو موحد بالله أو من أمة محمد وهكذا لكن المسيحيين بقى فغير أنهم مسيحيون فهم برضه أقباط , نصارى , أهل الذمة , وأهل الكتاب في مقولة أخرى , وكفاتسة , وأربعة ريشة وفيه ناس بتقول عليهم كريست وقريبتها CH ودول طبعاً مستوردين وأخيراً فيه ناس لسه بتقول عليهم خواجات لا مؤاخذة ودى من بقايا الاستعمار باين عليها. أصل كوفتس هو كلمة Coptic أو أقباط بينما أربعة ريشة تعود إلى علامة الصليب ، خصوصاً أن المسيحيين في مصر يتميزون برسم الصليب كوشم في المعصم .
تلاقي واحد بيسألك تعرف مجدي ؟ تقوله مجدى مين ؟ , يقولك مجدى المسيحى ياجدع . الغريب بقى انك هتلاقي نفسك تلقائي كده بتقوله اه اعرفه ماله ؟ يعنى انت نفسك بذات شخصك ماعرفتش مجدي غير لما قالك المسيحي وهو ما لا تجده في أي بلد آخر . ستجد دائما بتاعالعيش المسيحى , العجلاتي المسيحي , البقال المسيحي , وفي المدرسة الأستاذ المسيحي ويزيد من المأساة بالتأكيد علي أن التعامل بين المسيحي والمسلم يشوبه التوتر الخفي وهو ما يتضح في معرض الكلام العادي بين المواطنين فلان ده مسيحي بس جدع , بس طيب , بس راجل , بس اسكت خالص . والعكس أيضا يحدث وبشدة وبحرارة , الواد ده مسلم بس أمين , بس بيحبنا , بس ابن ناس , بس سيبني في حالى الله يخليك . التفكير الطائفي أصاب المصريين ، في جمل مثل مابكولش عند نصاري أو حتى ليه ياعم هو مال نصاري ؟ العجيب أن الجملة زمان كانت بتتقال ليه ياعم هو مال يهود ؟ وبعد فترة واضح أن الناس بدأت تأخد بالها أن مافيش يهود في مصر أصلا .. بقت الجملة هو مال نصارى .
عن المال ، ده انتوا متحكمين في نص اقتصاد مصر , فحسب اعتقاد كثير من المسلمين في مصر أن المسيحيين أغنياء والكنيسة تصرف على الفقراء القليلين منهم ولكن لا يا أساتذة ابسلوتلي الكلام ده مش حقيقي والمسيحيين في مصر مش كلهم ساويرس وغبور يعني وروح الصعيد وانت تشوف العجب العجاب أوعى تفتكر أن المسيحيين في مصر كلهم راكبين عربيات وعندهم محلات ذهب وعصير قصب في رمسيس دول الغلابة أكتر من اللي في تاهيتي يابا . يعيب على المسيحيين في مصر حالة الانطواء والانكفاء التى اختاروها لأنفسهم فهناك دائما في الجامعات شارع النصارى ففي جامعة القاهرة هناك شارع دقة وفي عين شمس شارع ch لكن اللي تستغرب له فعلا أنك تلاقي الأمن في الجامعة , أي جامعة بيتعامل مع المسيحيين على اعتبار أنهم جماعة برضه والطلبة المسيحيين بيتعاملوا مع الموضوع بنفس حس طلبة الإخوان وعارفين أو حاسين على الأقل أن العين عليهم رغم أنهم أصلا خيبانين ومش بيعملوا أي حاجة ولا ليهم حتى في المظاهرات والاحتجاجات اللي بتحصل من الطلبة .
اشمعنى المسلمين بيبقي عندهم فضول يدخلوا كنيسة لكن المسيحيين مش بيحبوا يدخلوا مساجد من أصله ؟ , اشمعنى في حصة الدين في المدرسة الطلبة المسيحيين هما اللي بيخرجوا من الفصل والمسلمين بياخدوا الحصة في مكانهم ؟ و "اشمعنى وزير البيئة في مصر دايما يبقي مسيحي وأي وزير تاني مسلم ؟ اشمعنى في مصر مروة الشربيني اللي اتقتلت في المانيا يقولوا عليها شهيدة وبتوع نجع حمادي اللي اتقتلوا برضه بيقولوا عليهم ضحايا ؟.
![]() |
مسيحية |
أرثذوكسية - أقباط - العهد القديم - العهد الجديد - الثالوث الأقدس - الصليب - بابا الفاتيكان - برسوم المحرقي - تلاميذ المسيح - خطيئة آدم - مكاري يونان - مار جرجس - مار خوريوس - مسيحية - مريم العذراء - يسوع المسيح |