دعسة إصبع
شي يوم من هالأيام رح يكون الرب بمزاج رايق وفاضيلكن ، وجاي عبالو يفتح الدفاتر القديمة معكون ، إنتو وقتا بتكونو بالقبر مستأنسين بجيرة أنكر ونكير .. و إذا بليلة مافيا ضو قمر بصيح الله وبقول ؛ يلا يوم القيامة شباب ! , فورا ً الشيطان بينهز بدنو .. أعور الدجال بيتجهز ..الحوريات بتتمشط ..النار عم تغلي وتفور و عاجقة بالسما والملايكة عم تتطاحش ببعضها عالنزلة والطلعة ، ولك اليوم يوم الحساب !! يوم الانتقام وأخذ التارات ويوم لاينفع علم ولا مال ! .
فأنتو بعد ما كنتو رفات بتنتفض جزيئات بدنكن وبتتجمع ثم بتتوحد بقدرة قادر سبحانو ! و بتقوموا من القبر مذهولين ! وبتشوفوا كيف الجن عم يسرحو ويمرحوا بالأرض متلكن تماماً ! .كل علامات الساعة الموعودة واضحة بطريقة غامضة . وكأنكن بكواليس فيلم درامي عتيق , للأسف مافي اقمار صناعية ولا تلفزيونات ولا شبكات تواصل توضحلنا ليش الشمس لازقة بمؤخرة الأرض ومتربعة فوق راس الكفار بشبر ! سبحانك ربي مالك المجرات مبدع المنطق !
ماعلينا ..انتو من شلة شبيحة الله المحظوظين ! الرحمة نازلة عليكون و صافين بطابور الحساب كأي مسلمين مسالمين بالفطرة ! بس لأنكن عرب ، رح تساوو عجقة سير طبعاً ! ورح يختلط المؤمن بالكافر وتضيع الطاسة ! , بقوم ملك من هالملائكة بيتوغوش وبيفقد السيطرة وبعيط : ولك وقفوا عالدور . هون الله بحس إنو في أشكالية بالذرة لمعروفة باسم كوكب الأرض وكأي رب يهتم بالتفاصيل رح يهتم بأمرنا رغم اننا مهمشين ووجودنا مالو طعمة قدام عزتو وجلالو وضخامتو وجبروتو وسعة حكمتو ..سبحانو! , إنتو هيك بتتكركبوا كتيرر وبتفوتوا ببعضكن ولي عبعضي ! متل مابتعرفوا الليلة بألف سنة وريحة عرق وقرف ،فبتقوموا بتعملو مظاهرة عالله ! منددين بعبارات مثل ؛ يااارب العالمييين #اسرع_يوم_الحساااب #نطالب_بسرعة_الحساب #يارب_استعجللنا_بالقيامة #وين_السلطة_الحكيمة_وين
وهيك الله بيستغرب كتيرر و بيوجعوا راسو من فوضتكن وبياخد عخاطرو إنو عبادو عم يساوو فيه هيك ! وانتو بتعرفوه متسرع وخلقو ديّق وقراراتو بتنزل من صاروخ السكود سريعة وقوية وحاسمة لا مفر منها ! بقوم بأصدر فرمان مستعجل بقول فيه (بما معناه) ؛ جكارة ونكاية فيكون قررت إلغي الجنة وإلغي النار وفجأة ، بقوم بيشلح جرابو وبشمر عن رجلو وبمدا من السماء الى الفضاء و بيضحك ضحكة خبيثة و بيفعس كويكب الأرض بأصبعة رجلو الصغيرة وهيك بتنتهى حياة الــ ٧ مليار نهاية غير سعيدة للاسف.