سندريلا
سندريلا (عراقي: ستريله امريكي: Cindrella هندي: سندي فلفل عربي: السندة بنت الريل) هي اسطورة شعبية عالمية عرفت حول اوساط العالم باشكال مختلفه الا ان النسخة الاصليه لله الحمد و النعمة هي عربية لا غبار عليها كما هو شأن سائر ما تراه في درب التبانه. و في عام 2007 تم انعقاد مجتمع علمي حول هذه النقطة حيث حاول اليهود و الصليبين و من لف لفهم من الكراوي التعبانة ان ينسبو هذه القصة الاسلامية الى تراثهم لكن جهود المؤرخ و الباحث الصحاف ابن سعيد محمد, احد صحابة صدام حسين عليه السلام, اسقطت في يد الملاعين الكفرة, و فيما يلي نص المخطوطة التي تلاها الصحاف, التي وجدت تحت جزدان الملك البابلي هارون الشريد في متحف من "نبوخذ نصر الى صدام حسين بابل طشارها ماله والي":
نص الوثيقة:
كان يا ما كان في عتيك الزمان (من جان الرسيفر ب 5 دنانير ونص و من جان البعير همر و من جان الصمون ينباع فل( جان اكو حاتة اسمها سندريلا خوش حاتة أصيلة و علمودها غنة حسام الأغنية مال العكربة,,,المهم جان عدها مرة أب كلش خبيثة و جانت تشتغل وية الأمريكان مترجمة و ابوها جان خطية يبيع قوايش مبردات حجم 1100 و أحيانا يبيع شخاط فلّ خوش ازلمة جان مال أول ... و جانوا الكل سايكين على سندريلا خطية روحي سوي الجوزة مال مولد فصلت ,,,روحي اوكفي سرة عالغاز,,, روحي السهام العبيدي اشتري شحاطات ال خواتج (اللي همة جانوا 3 خوات بس من غير أب هم خبيثات للهامة ),,,روحي شلعي الشتايكر مال السطح و رجعيه مرة لخ,,,روحي جيبي لفات فلافل مشي,,روحي بدلي الدهن مال المولدة الاقصى كامت أتفحّط ...و هاي خطية جانت كلش حبااابة و تروح ولا تفتح حلكها (بس من جواها جان التقسيم مشتغل) المهم,,,,,إلى أن يوم من الايام جانت داتصعد مي ابجليكان ابو ال 20 (المي ضعيف و الماطور ما ايصعد لان ماكو كهرباء) لكت بالطرمة فانوس بس شنوو مزنجر و عتيك عبالك جان بدوائر الدولة و اتحوسم جتي عليه فركته و جرررب كام يطلع دخان سندريللا انرعصت و ازبهّلت و رجعت خطوتين للخلف بسبب المفاجأة حتى انركعت بالدنكة(مع انه ما جان اكو دنكة) و كالت :هاي شنو العالم حتى هنا ايحركون زبل و تايرات؟؟؟شنو هال دخان هذا؟الدخان شوية شوية اتحول إلى جني لابس دريس مال برشلونة و بوتين اديداس وسوار ذهب و حاط معطر freedom for men و كللها:-
-شبيك لبيك عبدك بين يديك أنا الجني رامي من العرصات شتريدين اسويلج بس عال سريع لأن ماما دكتلي مسكول لازم ارجع
-عمو جني أريد وطني 24 ساعة ممكن؟
-ولج بابة هوة آني ساحب واير 5 أمبير من مولد للفانوس شلون اجيبلج الج وطني 24 ساعة؟ شنو جني لو وزير الكهرباء؟
-زين عمو عمو أريد قنينة مال غاز متروسة لأن معوزين و كلش .....
-ولج عمو شنو هال حجي؟ ولج انتي شكد فكرية.. اكو واحد يطلب من جني قنينة مال غاز؟ شايفتني رابط الفانوس عال حصان؟
-عمو عمو لعد شتكدر تسويلي؟
-باعي عمو انتي بعدج صغيرة و محرومة و الأمير راح ايسوي حفلة و ادري عائلتج راح تروح شنو رايج لو أخليج تروحين و تتونسين؟ احتمال تطلعين بصاية و صرماية لأن الشرقية هم دتصور هناك حفلة طاكة بابة.
- زين اشون اروح عمو؟نفرات لو كيا؟
-بابة معليج هسة غمضي عينج....
سندريلا غمضت عينها (و من الغريب يا جماعة انه أول ما غمضت عينها ما كامت اتشوف و هذا الشي محد لكالة تفسير لي هسة)و جررررب شافت سندريلا نفسها لابسة تنورة كصيرة و بدي و حذاء مفتوح يعني طلعت حااتة اللا مش ممكن (الجني زرك لسهام العبيدي و طرق عال سريع ورقة و نص و جابلهيا لأن طلع لوكي مال حاتات عتيك)و كللها الحلفة اقصد الحفلة تخلص بال 8 و نص علمود منع التجول و كل هاي الهدوم راح توكع و الحذاء و الميك اب و كلشي راح يختفي إذا عبرت ال 8 و نص و احتمال تنلعسين بالطريق
-حاضر عمو شكرااااااااااااااااااااااا(هاي شكرا الطويلة مال الزعاطيط)
وصلت سندريلا البيت الأمير جان امسوي حفلة لان طلع 77 بالسادس حيروح أهلية احتمال أو طب بيطري بعد ما اعرف و الحفلة جان بيها نجود و سمراء و ساجدة عبيد(كله هجع و عالكة) و سهام السبتي هم جانت موجودة و الأمير شاد الرباط علة راسه و امقندل و صاير طلي و ردح لليافوخ و فجأة الأمير صاد سندريلا و عجبته و كابلها جتف ساعتين و سندريلا نست روحها و نست الكراب و السراوات و البهذلة و نزلت ردح إلى أن صارت 8 و نص ......اللهّّّّ!!!!! انلاصت اتذكرت الوصية مال رامي الجني و كالت لازم اشطح و ركضتلك عال سريع جنها برزلة هستوها مجفتة و الأمير وراها:
-وج تعاااي شبيج تخبلتي؟مو دا احاجيج ؟؟؟ وين مولية ؟؟؟ فضيلة(هلكد ما سكران نسة اسمها)المهم ركضت سندريلا و جررب وكع الحذاء مالتها بلا ما تدري جان الامير يشيل الحذاء و لزمه و ضل صافن عالعالم اللي انتبهوا عال لقطة و كاموا يباوعون عليه الامير بقة شايل الحذاء و مصدوم و صورة سندريلا الحلوة بباله,,, الحفلة توقفت طبعا و العالم سكتت من المفاجأة
جان يباوع الأمير عالعالم ....صنطة.......و كال للناس :
الشركة العامة للصناعات الجلدية: فخر الصناعة الوطنية العراقية خبرة و تميز في مجال المصنوعات الجلدية من الأحذية و الحقائب بأرقى المواد الأولية الفرع الرئيسي :الكرادة قرب جسر ابو الطابقين